MZU Southern Campus din theih nan Chhimbial Chhantu-in hmalak an tum

Chhimbial Chhantu hruaitute chu September 9, Inrinni khan Bazar Venga C Zokhuma inah an ṭhukhawm a; Lung­leia Mizoram University (MZU) Southern Campus din a nih theih nan hmalak an rel. Meeting hi an president C Lalsangliana'n a kaihruai.

Chhimbial Chhantu thuchhuah tarlan danin, MZU Southern Campus din a nih theih nana kum 2009-a UGC chancellor hnena MZP hminga rawtna thawn chu 11th. Plan hnuaiah a pawm a ni a, 12th. Plan hnuaia tihhlawhtlin tura tih a ni. MZU pawhin pilot team tirin, YMA kaihhruaina hnuaia Lungleia Coordination Committee chuan a hmun atan Pukpui ram an kawhhmuh.

Coordination Committee chuan concept note an siam a, thuneitu­te hnenah an thehlut tawh. Ministry of Human Resources Development pawhin MZU Southern Campus, Lungleia din dan tur chungchangah chief minister Lal Thanhawla lehkha an thawn tawh a ni.

Chhimbial Chhantu chuan, Lungleiah MZU Southern Campus hawn a nih ngei theih nan hmalak nghal ni se, an ti. A buaipuitu bik convener atan Rev.Dr Raltawnga an ruat bakah, member atan Lalremliana Pachuau, Eric R Zomuanpuia leh Chawngchhuana Chawngthu-te an ruat a ni.