MNF-in Fûrpui Campaign an chhunzawm

MNF party-in Inrinni zing khan Aizawl leh a chhehvelah Fûrpui Campaign an buatsaih leh a; Aizawl khawpui chhung bakah, Sairang leh Sihphirahte vantlang inkhawm an buatsaih.

Sairang Dawrkâwna inkhawmah MNF general secretary Lalruatkima, MLA-in thu sawiin, Mizoram pumah kawngpui a chhiat avangin mipuiin harsatna an tâwk nasa tawh hle niin a sawi a; kawng chhia en tura Health Minister a feh chhuak hlauh chu thil inhmeh lo tak nia sawiin, Congress sorkarin PWD Minister a nei lo em ni tih a zâwt a ni.

Lalruatkima chuan, Congress-in NLUP chu Pathian programme niin sawi ṭhin mah se, an hlawhchhampui tho niin a sawi a; NLUP atan cheng vbc. 3,000 chuang an séng tawh chungin hmasawnna hmuh tur a awm lo a, CAG pawhin a hlawhchhamzia a tarlang tih a sawi bawk.

Bethlehem Vengthlang kâwnah thu sawitu Lalrinawma, MLA chuan, Aizawl traffic jam tihziaawm nan skul ṭan hun sawn hma a nih thu sawiin, chu chuan naupangah nghawng ṭha lo a thlen niin a sawi a; MNF party-in thuneihna an chan hunah sikul ṭan hun chu an ennawn tur thu a sawi.

MNF Fûrpui Campaign hi Durtlang Leitan, Zarkawt, New Market, Sikulpuikawn, Bungkawn, Dinthar leh Ramhlun South-ahte neih a ni bawk a; heng hmunahte hian an party hotute'n thu an sawi a ni.