MZU-ah VC nghet dah thuai turin Ronald Sapa'n Prime Minister a ngen

Mizoram Rajya Sabha member Ronald Sapa Tlau chuan September 8, 2017 khan prime minister Narendra Modi hnenah lehkha thawnin, Mizoram University (MZU)-ah vice chancellor (VC) nghet dah thuai a nih theih nana hma la turin a ngen.

Ronald Sapa Tlau chuan PM hnena lehkha a thawnah hian, MZU zirlaite'n MZU VC nghet dah an phût avangin September 6, 2017 aṭangin tiam chin awm loin MZU an dang a, ni thum chhung MZU-ah zirna leh thil dang reng reng a kal theih tawh loh thu a ziak.

MZU chu kum hnih dawn VC nghet nei loa a kal tawh thu ziakin, VC nghet awm loh vang­in harsatna hrang hrang an tawh thu a ziak a, "Hemi chungchang hi Human Resource Development minister Prakash Javadekar hnenah pawh ka thlen tawh a, a ṭul anga a lo en zui tur thuin min chhang tawh a ni," a ti.

Rajya Sabha MP hian MZU-ah VC nghet dah turin Mizoram chief minister Lal Thanhawla'n ziak­in ngenna a thlen tawh thu te, MZU Tea­chers' Association pawhin an thlen tawh thu te a ziak a; tunah VC nghet dah phût vangin MZU-ah zirna chhunzawm theih loha a awm mek avangin, a ṭul anga inrawlh a, a rang thei ang bera VC nghet dah a nih theih nana hma la turin PM Narendra Modi a ngen a ni.