Chief minister-in Mizo rider-te a lawmpui

Chief minister Lal Thanhawla chuan September 8, Zirtawpni tlai khan a bangla-ah Mizoram Motorsports Association(MiMSA) hruaitute leh Coimbatore-a zawh taka champion Lalhruaizela leh amah dawttu Lalnunsanga te hlawhtlinna a lawmpui a; an kal zelna tura hmalakpui dan turte a sawipui.

CM Lal Thanhawla chuan, harsatna tam tak paltlang a, inpêkna thûk tak, tumruhna leh taimakna nena hlawhtlin tum tlat hmuh tur an awm zel chu lawm­awm a tih thu a sawi a; sorkarin mi tumruh, ṭan lak nachang hria leh theihtawp chhuahte chu an hlawhtlin lehzual theih nan theih­tawp a chhuahpui zel dawn tih a hrilh.

Lal Thanhawla chuan, kawng tinrenga hmasawnna turin sorkar­in ṭhalaite tan khawvel thar a siam chhunzawm zel dawn tih a sawi a; Mizo rider hlawhtlingte chu hlawhtlinna sang zawk chang turin duhsakna hlan a, Mizote tihmingṭhatu ni turin a chah.

MiMSA hruaitute leh Chief Minister hian Mizo rider-te chhawmdawl a, tihhmasawn theih dan tur leh an mamawh infrastructure ṭha zawk siam dan turte an sawiho a ni.