KHAWTHLIR

Eng awm dawn lo
Vawiin zing dar 8 leh chawhnu dar 2 inkar hian Power Grid Corporation of India-in Zuangtui sub-station-a kawlphetha pekna an siamṭha dawn a, hei vang hian hna thawh chhungin Zuangtui sub-station-in a châwm zawng zawngte'n kawlphetha an hmu thei dawn lo tih Power & Electricity department chuan an tarlang. Kawlphetha hmu lo turte hi Aizawl hmar lam leh chhuah lam veng te, Serchhip aṭanga chhim lam zawng te, Champhai leh Mamit tlangdungte a ni.

Truck-in hnâwl
September 9, Inrinni zing dar 6 vel khan Chaltlang Bethel Vengah 407 truck-in bullet bike a hnâwl a, truck khalhtu, Lalawmpuia, Sesawng khua chu police-in an man nghal. Bike khalhtu, K Malsawmkima leh a nupui Zosangliani, Durtlang Leitan chu an hliam a, damdawi-inah enkawl mek an ni.

Pang zirlai
Páng Zirlai Pawl joint headquarters, Aizawl chuan Inrinni khan an zirlai tharte lawmna hun an hmang a, Lai Autonomous District Council chief executive member T Zakunga leh executive member C Lalneihkhuma ten an hmanpui.

Kawng thawm tha
Zoram Drivers' Union, Vairengte huaihawtin Vairengta sumdawnna lirthei neitute chuan Inrinni khan kawng siamṭhat hnatlang an nei a; pawl hrang hrang aṭangin mi 200 vel thawk chhuakin, kawng khuar chhe zual laite an thawm ṭha a ni.

Ganja suat
YMA sub-headquarters, Champhai-in ruihhlo do beihpui thlak tura YMA group leh branch hrang hrangte a ngen angin, Khawzawl group YMA huam chhunga branch hrang hrangte chuan tunlai hian Khawzawl khawpui chhung leh a chhehvelahte ganja suat beihpui an thlak.