State Anti-Tobacco Day hman a ni

Mizoram State Anti-Tobacco Day vawi 4-na pualin nimin khan Mizoram hmun hrang hrangah hun hman a ni a, Aizawlah chuan Lal Thanhawla Auditorium-ah hun hman a ni a, chief minister Lal Thanhawla'n a hmanpui a, thupui chu 'Vaihlo tel lo infiam­na' tih a ni. Inkhawmah hian zirlaite leh sport association hrang hrang hruaitute an tel.

Chief Minister chuan, sport association hrang hranga hruaitute zinga a tam zawk chu zûk leh hmuam, a bikin vaihlo leh kuhva khàwr kaihhnawiha fihlim lote an nih thu a sawi a, "An insiam ṭhat thuai ka beisei. Mizo mipui hian ringtu kan nihna angin taksa chhung leh páwn invawn faiah leh zûk leh hmuama fihlimna kawngah mawhphurhna pawimawh tak neitute kan ni," a ti.

Lal Thanhawla chuan, Mizoram Olym­pic Association president a nihna angin, Mizorama sport administrator zawng zawngte chu zûk leh hmuam, a bikin kuhva leh meizûkah fihlim tura ngenin, "Khawvel changkang zela infiamna hmasawn zelin min kaihhruaina leh min duh dan angin administrator zingah zûk leh hmuama fihlim lote an awm lohna tura hmalak zel dan pawh ngaihtuah a la ni leh ang," a ti a; infiammite zûk leh hmuama an fihlim theih nan sport administrator-te entawn tlaka an awm a ṭul thu a sawi.

Mizoram mipui náwlpuiin hrisel lohna kawng hrang hranga hma hruaitu nih chu zahthlak an tih a ṭul thu sawiin CM Hawla chuan, "Vaihlo hian hrisel lohna chi tinreng min thlen a, kan hmel, kan khawlaite min tibâltu, vaihlo leh a kaihhnawihte leh kuhva khàwr ei leh chinai liah kan sim a ngai," a ti.

Mizoram State Anti-Tobacco Day hi Health secretary Lalrinliana Fanai-in a kai­hruai a, Indian Society on Tobacco & Health, Mizoram Chapter president Lal Riliani, National Tobacco Control Programme state nodal officer Dr Jane Ralte leh Mizoram State Sports Council secretary C Laltlanthanga te pawhin thu an sawi.

Inkhawmah hian zûk leh hmuam donna kawnga an awmna huang bika hma la ṭha - New Life Hospital; Millennium English School, Zemabawk; Serchhip College; Kolasib District Hospital leh Mizoram Amateur Taekwondo Association-te hnenah lawmman hlan a ni.