2018 holiday-ah YMA Day paih a ni

Mizoram sorkara General Administration Department (GAD) chuan nimin khan notification tichhuakin, kum 2018 chhunga sorkar chawlh (holiday) atana puante a tichhuak a; holiday atana puan ni 17 zingah YMA Day a tel lo.

GAD notification-a a lan danin, kum 2018 (calendar year) chhunga Mizoram sorkar holiday atana puan ni 17 zinga ni 15 chu hna thawh ni pangngai (weekday)-a tla a ni a, ni pahnih - Remna Ni leh Idul Fitr (June 16) erawh chu chawlh ni awm sa, Inrinni-ah a tla thung.

GAD chuan restricted holiday atana puan ni 33 a awm tih a tarlang. Sorkar hnathawkte chuan restricted holiday ni 33 zinga an duh ber ni hnih chu an chawlh ni atan an hmang thei dawn a ni.

Restricted holiday zingah hian hun rei tak chhung Mizoram sorkar chawlh ni (holiday) atana puan tawh ṭhin, YMA Day (June 15) pawh a tel a; Mizo mipuiin an ngaih pawimawh dang - Missionary Day (January 11) leh, MHIP Day (July 6)-te pawh restricted holiday zingah telh a ni.