Bawngkawn ram chungchangah Bawngkawn PS-ah FIR thehluh a ni

Bawngkawn leh Chaltlang North inrina, kawng pêngṭhuama kawngpui zauhna tura ram lak tawh leh land lease siam tawh, mimal kuta a luh leh hralh chungchangah nimin khan Bawngkawn Police Station-ah first information report (FIR) a lut.

Bawngkawn PS-a FIR thehluttu hi Lalnunmawia, Zemabawk Tlangveng a ni a, nimin chawhnu dar 2 vel khan Bawngkawn PS Officer-in-Charge hnenah FIR hi a thehlut a ni.

Lalnunmawia FIR-ah hian, Bawngkawn kawng péngṭhuam zauhna tura Lal-

ṭhai, Ramhlun South ram lak tawh, MNF President hminga land lease no. 117 of 2005 chungchang chu Vanglaini chanchinbu, September 11, 2017-a chhuakah, 'Bawngkawn kawng zauh tum a buai, Ram lak tawh mimal kutah a lut leh' tih thupuia hmangin a chhuah thu a tarlang.

Lalnunmawia chuan, "Bawngkawn kawng laih zauh tuma buaina sawiah khan, kawng lai zauh tumna lai tak chu 'Land Lease no. 117 of 2005, MNF President hminga awm mek chu, mi pakhat Dr Don Sapremsanga s/o H Sapthangliana Halliday chuan, Lalrodingi d/o Lalthanliana, Mission Veng hnenah Rs. 1,50,00,000 (cheng nuaih 150)-in a hralh,' tih hi a ṭul anga min chhui chhuahsak a, dan bawhchhiatna a awm ngei a lan avangin, tisualtu chu action min laksak turin ka ngen a che," a ti.

Tarlan tawh angin, Lalṭhai hian a ram, bigha 0.08-a zau chu kum 2005-ah sorkarah a hlan a, a LSC no. 10312/01/631 of 2002 chu land lease-a siam niin, MNF general headquarters President hminga dah a ni. Certificate of Land Lease-a Terms and Condition-ah, ram chu a pumpui emaw, a ṭhen lai emaw hralh, mi dang hnena pek leh hlan phal a nih loh thu te, ram chu hman ṭangkai a nih loh chuan a neituin sorkarah a pe tur a nih thute a chuang.

MNF President hminga dah land lease no. 117 of 2005 chu kum 2015-ah Dr Don Sapremsanga Halliday-in Lalrodingi d/o R Lalthanliana, Mission Veng hnenah Rs. 1,50,00,000-in a hralh. March 15, 2016-ah Don Sapremsanga'n ram pass lehkha pawimawhte chu Lalrodingi hnenah a hlan a ni.