MPC-in zawmtu pungah an inngai

MPC party chuan thuchhuah siamin, Mizoram tluchhe mek siamṭhaa tung ding leh tura MPC, ZNP leh ZEM-te'n thawhhona thuthlung siam a, Mizoramah sorkar thar siam ngei tuma an hmalakna chu zawmtu an pung zel niin an tarlang.

MPC chuan, Mizoram hmun hrang hranga MPC party mi leh sa, ngui leh chau taka awm tawhte kaihharhin an awm mek zel nia sawiin, "Tun hnaiah MPC hruaitute hmalaknain Serchhipah MPC party block din thar leh a ni a, disrict hrang hrangah pawh block leh unit din tura hmalakna kalpui tum zel a ni," an ti.

MPC, ZNP leh ZEM-te thawhhona chu zawmtu an pung zel nia sawiin, "Congress leh MNF party-a phusa tak takte pawhin he thawhhona huang aṭang ngeia ram siam duha an inhmakhua mek zel hian, ram siam hna chelhtir leh tur chuan an hotute an ring zo tawh lo, tih a tilang chiang hleah kan ngai," an ti a; MPC, ZNP leh ZEM-ten sorkarna an siam ngei theih nana thawhpuiah mipui an sáwm a ni.