Tuichang lei tlahniam siam chhunzawm dawn

Mizoram State Women Commission chairperson Vanlalawmpuii Chawngthu, MLA chuan nimin khan a bial chhung, Tuichang lei innghahna tlahniam a enfiah a; Tuichang lei tlahniam siam chhunzawm zel a ni dawn tih a sawi.

Vanlalawmpuii Chawngthu chuan, Tuichang lei zawmtu kawng tlahniam chu vawiin aṭangin siamṭhat hna thawh nghal a ni dawn tih a sawi a; Hrangturzo bial chhunga fûr ruahtui tlak nasat vanga kawng khuarte hnawh a nih tur thu sawiin, "Tuichang kawng khuar nasa zual pawh hnawhkhaha siam nghal tum a ni," a ti.

Vanlalawmpuii chuan, Keiṭum leh Tuichang lui inkar kawngpuia khuar chhe zual laite pawh siam nghal tum a nih thu leh, Tuichang lei chu a vengtu dahin, a vengtute'n an riah chilh reng thu a sawi bawk. MLA hi PWD SDO Lalmuanpuia leh junior engineer R Lalrohlua ten an ṭawiawm a ni.

Tuichang lei hi kum 1985-a siam a ni a, lei chu leia a innghahna bula a tlahniam a, lei ban erawh a hrana ding a nih avangin zin veivâk tan a hlauhawm rih loa ngaih a ni. A tlakhniam hmain motor metric ton 10 chin zawh phal a ni a, tunah chuan metric ton 5 chin zawh theih turin Serchhip DC hnena thlen tum a ni.