World Suicide Prevention Day hman a ni

Health department hnuaia Department of Psychiatry leh National Mental Health Programme (NMHP) bultumin nimin khan Chanmari YMA Hall-ah World Suicide Prevention Day hman a ni a, Health minister Lal Thanzara'n a hmanpui.

Health Minister chuan, dam thlahlel tawh lo hial khawpa mi beidawngte'n beiseina thar an neih leh theih nan mi tinin tih theih an nei tih hria a, World Suicide Prevention Day-ah rilru thar pu turin kalkhawmte a sáwm a, "Mahni nunna lak tum, dam chhuak lehte'n an nuna harsatna vàwrtàwp an tawh laia an chanchin ngaihthlaksak leh hriatpuitu an thlahlel a ni," a ti.

Mahni intihhlum tumte thil tum rapthlak tak lak ata chhan chhuak a, kawng dang kawh­hmuh theitu an nghahhlelh zia an sawi aṭangtein thiamna hranpa nei lote pawhin an tan tih theih an nei tih sawiin Lal Thanzara chuan, "Heng mite hian ngaihsaktu leh ngaihventu an mamawh a ni," a ti a; mi beidawngte tana minute khat chauh pawh sênin mihring nunna chhanhim theih a nih thu a sawi.

Health Minister hian rilru hriselna lama Mizote'n hma an sawn theih nana buatsaih music video, 'It's alright, it's okay' tih a tlangzarh nghal a ni.

Inkhawmah hian Hrangbana College, Pachhunga University College leh Aizawl West College zirlaite'n 'Suicide prevention hi professional-te chauh tih tur a ni,' tih thupuia hmangin debate an nei.

International Association for Suicide Prevention leh World Health Organisation-te hmalaknain World Suicide Prevention Day hi kum 2003 aṭangin September 10-ah hman ṭhin a ni a, kumin hian thupui atan 'Take a minute, change a life' tih hman a ni.