KHAWTHLIR

Dan chhunzawm
Mizoram University Students’ Council (MZUSC) chuan an university-a Vice Chancellor dah ngheh phutin staff leh zirlaite university-a kai tur an dan chhunzawm zel. Pachhunga University College Students Union (SU) pawhin MZUSC-te hmalakna thlawpin nimin aṭang khan staff leh zirlaite college kai tur an dang ṭan ni a, MZU-a VC nghet dah thuai turin sorkar laipui an phût a ni.

Thawpuiah sawm
Lawngtlai DC thar Dr. Arun T chuan nimin khan Lawngtlaia thuthar thehdarhtute a pisa-ah kawmin, thawhpuiah a sawm. Dr. Arun T chuan Lawngtlai DC hna a chelh chhungin, a tih tur hrang hrangte hlen chhuah zel a tum thu sawiin, chanchinbumite chu district chhung chanchin chipchiar taka hria leh mipui nena inngheng reng an nih avangin, a tum a hlen theih nan an ṭawiawmna leh finchhuahna a mamawh thu a hrilh.

NLUP sem
Agriculture department chuan nimin khan Lungdaiah NLUP ṭanpuina an sem a, bialtu MLA Hmingdailova Khiangte-in a hmanpui. Ṭanpuina hi mi 188 hnenah cheng nuai 52.55 sem a ni.

JICA-in tlawh
Japan International Cooperation Agency (JICA) chuan Mizoram sorkar nen an thawh dunna bawhzuiin, tun hnai khan Tachhip khua an tlawh a; khawtlang hruaitu hrang hrangte nen lo leh huan neitute'n harsatna an neih chi hrang hrangte an sawiho a, hmalak dan tur an rel nghal a ni.

Roll sawiho
Special Summary Revision of Electoral Rolls, 2018 neih tur chungchang ngaihtuahin nimin khan Aizawl District Level Standing Committee chu DC Dr. A Muthamma hoin DC conference hall-ah an
ṭhukhawm. Meeting-a tarlan a nih danin, Electoral Roll Draft publication chu ni 15.09.2017-ah tihchhuah tum a ni a, roll a luh dil duh tan ni 15.09.2017 - 13.10.2017 chhungin dilna thehluh theih a ni ang. Meeting-ah hian political party, tlawmngai pawlte leh official-te an tel.