New Delhi-a châm mek chief minister Zoramthanga chuan September 21, Nilaini tlai khan President Droupadi Murmu chu a chenna Rashtrapati Bhavan-ah a kâwm. Chief Minister hian nimin khan Union Health and Family Welfare minister Mansukh L Mandaviya chu a pisaah a kâwm a; sorkar laipuiin hmarchhak state-a medical college tam tak a laa a châwm angin, Zoram Medical College (ZMC) chu la ve turin a ngen.
Chief Minister hian President hi Mizorama hmalakna pawimawhte leh hmachhawpte tihhlawhtlinna tura sorkar laipui ministry hrang hrang hnena mamawh a thlente a sawipui a ni. 
Union Health Minister nen an inkawmnaah Zoramthanga chuan, ZMC enkawl chu Mizoram sorkar tan a hautak dan te, mithiamte'n zirchianna an neih hnuah ruahmanna ṭha nia an hriatte sorkar laipuiah an thehluh tawh thu te, ZMC-a seat chungchangte leh thil dangte a sawi a ni.
Mansukh L Mandaviya chuan, Zoramthanga ngenna chu Health Ministry leh Mizoram Health department-te'n an pawm tlân theih ve ve turin sawiho ni se, a ti a; Mizoram dinhmun a hriatthiampui thu leh theihtawp a chhuahpui tur thu a sawi.
CM Zoramthanga'n Mizoram Cancer Hospital atana cheng vbc. 10 vel man khawl leina tur Health Ministry aṭanga puihna dil a nih thu a sawi chu Union Minister chuan tihhlawhtlin a nih theih nan theihtawp a chhuahpui tur thu a lo hrilh bawk tih sorkar thuchhuahin a tarlang.
Chief Minister hian September 21, Nilaini leh nimin khan Union Home minister Amit Shah leh Road Transport & Highways minister Nitin Gadkari-te pawh a kawm.
Sorkar thuchhuah tarlan danin, Zoramthanga hian India ramin zalenna a hmuh champha vawi 75-na lawmna atan Zokhawsanga Assam Rifles hmun thar chu hawng turin Union Home Minister a sáwm a; Amit Shah chuan a pawm a, a hun tur chu sawi ṭhat leh a ngaih tur thu a lo hrilh a ni.
Chief Minister hi Planning Board vice chairman H Rammawi leh Delhi Mizoram House resident commissioner Amjad Tak ten an ṭawiawm a ni.