AYUSH leh Women & Child Development enkawltu minister of state Dr Munjpara Ma­hendrabhai chu nimin khan Mizoramah a lo zin a, Aijal Club-ah Mizorama AYUSH Directorate leh Women & Child Development department hotute nen an hnathawh leh hmalaknate an thlir lêt.
Dr Munjpara Mahen­drabhai chuan, a enkawl ministry pahnih chu ram pumah ṭha taka kalpui mek a nih thu sawiin, "Mizoramah pawh mipuiin AYUSH lam thiamnate an hriselna atan an hmang ṭangkai mek hi a lawmawm. Ayurveda phei chu hmasang aṭangin India-in hriselna chungchanga system of medicine a neih leh kalpui a ni a, mipuiin an hlâwkpuiin an ṭangkaipui hle," a ti a; AYUSH chu nunphunga neih a pawimawh avangin mipui hriata puan­zar tam a ṭul thu a sawi. 
Ṭhutkhawma tarlan danin, Mizoramah a nghet leh nghet loa thawk AYUSH doctor 89 leh support staff 99 an awm mek. AYUSH hian kum 2021-22 chhungin khaw 12-ah medical camp buatsaihin, mi 2,882 an endik a, Thenzawlah khum 50 awmna AYUSH Hospital leh district tam zawkah khum 10 awmna AYUSH inenkawlna a awm tawh.
Mizoramah AYUSH Health & Wellness Centre 38 din turin hmalak mek a ni a, chu'ng zinga a tam zawk chu hawn a ni tawh. Aizawlah cheng nuai 1,500 sênga sak tur khum 50 awmna AYUSH hospital leh Saitualah cheng nuai 750 sênga sak tur khum 10 awmna AYUSH damdawi-in atan sum pek chhuah tawh a ni. ICDS hnuaiah Mizoramah aganwadi centre 2,244 a awm a, anmahni pualin in an nei vek tawh. ICDS hi tun hnaiah Saksham Aganwadi tia thlak niin, Poshan 2.0 kalpui mek a ni a; Poshan 2.0 hnuaiah beneficiary 1,20,586 leh central scheme danga hmeichhe naupang kum 14-18 inkar beneficiary 5,506 an awm mek. Mizoramin ICDS a kalpui ṭhat vangin national award ṭum hnih a dawng tawh a, chu'ngah chuan lawmman cheng nuai 250 an dawng tawh a ni.