Lirthei intlân chhâwk dan tur tichhuak

Traffic SP Rodingliana Chawngthu chuan nimin khan thlasik laia Aizawla lirthei intlàn chhâwk dan tur a puang. Lirthei intlàn chhâwk dan tur ruahmanna thar hi October 3, 2022 aṭanga February 17, 2023 thleng hman tur a ni a; zing dar 9:30 aṭanga tlai dar 5 thleng a huam ang.

Aizawl Traffic SP tarlan danin, taxi leh two wheeler taxi-te chu sticker an neih sa hmangin zing dar 9 aṭanga tlai dar 5 inkarah an intlân chhâwk ang a, Pathianni leh sorkar chawlh (holiday)-ah an vaiin an tlan thei ang a. Inrinniah chawhnu dar 1 aṭangin an vaiin an tlan thei dawn.

Two wheeler taxi sticker A, B, C, D leh E zinga group pali zel Aizawl tlangdung kawngpui (main spine/ artery road)-ah an tlân thei dawn a, group pakhat zel an tlàn thei dawn lo. Inrinniah erawh chuan chawhnu dar 1 hnu lamah an vaiin tlangdung kawngpuiah tlan phalsak an ni.

Truck lian leh tê (HMV leh MMV)-te tan November 15 aṭanga nakkum February 14 thlengin zing 7 leh zan dar 7 inkarah Aizawl khawpuiah tlan luh phal a ni lo a, February 15 aṭanga November 14 inkarah zing dar 8 leh zan dar 7 inkarah tlan luh phal a ni lo bawk.