Mizoramah NREGS job card nei Chhungkaw 2,11,838 an awm

Sorkar laipui scheme, Mahatma Gandhi National Rural Employment Gua­rantee Act (MGNREGA) hnuaia job card nei Mizoramah chhungkua 2,11,838 an awm a, chu'ng zinga 2,10,641 chu Rural Development department-in job card nung mek (active) anga an ngaih a ni.

Mizoramah Rural Development (RD) block 26 a awm a; MGNREGA hnuaia jod card nei tamna ber chu Lunglei RD block niin, job card nei mi 17,990 an awm a, Thingsulthliahah chuan mi 3,767-in job card neiin, a tlemna ber block a ni. Tun dinhmunah job card neite'n ni khat an inhlawhin Rs 233 an hlawh ṭhin.

Hetih lai hian, RD department chuan job card 2,11,838 zinga 1,197 chu a nung tawh loah an ngai. Job card nung tawh lo a awm chhan chu - thihna vang te, awmna hmun sawn vang te, inhlawh ngai tawh loh vangte leh chhan dang vangte a ni.

Job card hi thingtlang (rural area)-a awmte tan chauh neih theih a nih avangin Aizawl khawpuia mite chuan an nei ve thei lo. Aizawla mite'n job card an neih theih loh chhan chu - municipal-ah Aizawl puan a nih tawh vang a ni a, Lunglei Municipal Council a din hunah Lunglei khawpuia chengte pawhin job card an nei thei tawh dawn lo nia thu dawn a ni.