Sorkar laipui hnuaia hmalakna thlirho

Hnahthial District Development Coordination & Monitoring Committee chu an chairman C Lalrosanga, Lok Sabha MP kaihhruaiin nimin khan Hnahthial College auditorium-ah an ṭhukhawm a, October 2021 aṭanga August 2022 chhunga sorkar laipui sum hmanga hnathawh hrang hrang an thlirho.

MP C Lalrosanga chuan, Hnahthial chu district thar a nih angin mamawh tam tak a awm tih a hriat thu leh sorkarin a ngaihtuah zel a beisei thu a sawi a, "India sorkarin thingtlang khaw kilkhawr ber thlenga tihhmasawn duhin cheng vaibelhchhe télin ruahmanna ṭha tak tak a siam a, Mizoramah pawh scheme eng emaw zat kalpui mek a ni," a ti a; hmansawnnate chu chak taka kalpui a nih theih nan kawngpui ṭha neih a pawimawh thu a sawi.

Mizorama kawngpui siam hna thawk mektu NHIDCL-te chu ṭha taka hna thawk tura chahin C Lalrosanga chuan, kawng laih vanga lirthei ṭhenkhat tana tlân hrehawm, khuar leh pâwng sang deuhte chu siamṭha nghal zel turin a chah a ni.

NHIDCL general manager SG Dwivedy chuan, Aizawl-Tuipang inkar km. 380-a thui kawngpui siam hna an thawh thu leh package pariatah ṭhen a nih thu a sawi a, "Kum 2023-ah zawh kan inbeisei. Covid-19 leng avang te, fûr ruahtui tam avang te, kawng laihna tura electric hrui leh PHE department pipeline seng fel loh ṭhenkhat avangtein hna kan thawk chak thei lo," a ti. Zangnadawmna la vek tawh mimal la insenghawi duh lote an awm thu a sawi bawk.