YMA chanchinbu enkawl dan inzirtir

Information & Public Relations (IPR) department leh Central YMA chuan nimin khan CYMA Hall-ah YMA chanchinbu enkawltute pualin chanchinbu enkawl dan zirhona an buatsaih. Khuallian, IPR minister Lalruatkima chuan, social media-a thu belhchian dâwl lo thlitfìm nan leh a chhiartute kawng dik leh thu dik, finfiah tlak chhawp chhuahna atan chanchinbu a pawimawh thu a sawi.

IPR Minister chuan, chanchinbu chu khawtlang inzirtirna leh ram leh hnam humhalhna atan hmanraw ṭangkai a nih thu a sawi a, "Mizo ṭawng ziah dan dik uar kawngah te, tunlai khawvel changkannain a ken tel social media-a thu belhchian dâwl lo tak tak thlitfim nan leh chhiartute kawng dik leh thu dik, finfiah tlak chhawp chhuahna atan chanchinbu a pawimawh em em a ni, " a ti.

Media-in naupang ṭawng thei lo aṭanga tar thlengin a nghawng tih sawiin Lalruatkima chuan, "Hetiang lama zirna pawh kan ngaih pawimawh deuh deuh a ṭul. A thiamte thukhawcháng kan ngaihchàn thiam a ṭul tak zet," a ti. YMA chu tlawmngai pawl, thliar bik nei lo, ṭanpui ngaite ṭanpuitu, Mizo nun ze mawi zirtirtu a nih angin media-ah pawh Mizo nun ze mawi a lan a mawi thu a sawi.

Thu sawitu dang IPR director C Lalnunkima chuan, "Chanchinbu kan buatsaih hian a dawngsawngtute'n eng angin nge an ngaih tih hi kan dàwn ve a ngai a, ṭawngkam hman leh thuziak uluk a, ṭhalai zawkte'n an tuipui leh an nun kaihruai thei thuziakah ngaihtuahna kan hman a ṭul," a ti.

Central YMA president R Lalngheta pawhin thu sawiin, chanchinbu buatsaih chu khawtlang leh ram tan a hlâwk a, YMA chanchinbu enkawltute'n hlawh leh hlâwkna beisei loa an thawhna chu a ropuina lai a nih thu a sawi.