Lungleiah RTI Act zirhona buatsaih

Lunglei Convention Centre-ah nimin khan District Training on RTI Act, 2005 buatsaih a ni a, chief information commissioner (CIC) Lalnunmawia Chuaungo, IAS (Rtd)-in a hmanpui. CIC chuan, mipui rorelna sorkar leh RTI Act chu thil kal kawp tlat a nih thu a sawi.

Training hi Lunglei additional DC Donny Lalruatsanga'n a kaihruai a; Lalnunmawia Chuaungo chuan, sorkar hmalakna leh hnathawhte hriat chu khua leh tuite chanvo a nih thu a sawi a, "RTI Act hi ram chhung state dangte aiin Mizoramah kan la hmang tlem hle. Mipui hrilhfiah a ṭul tak zet a, a ṭangkai tur anga mipuite'n an chhawr thiam theih nan inzirtirna chak taka kalpui zel a ṭul," a ti.

RTI Act Section 4 hnuaia Suo Moto Disclosure ngaih pawimawh a ṭul thu sawiin Lalnunmawia chuan, "Mizoram Information Commission (MIC)-ah zualkona a thleng tlem a, hei hi SPIO-te'n an tih tur ṭha taka an tih vang a ni," a ti a; SPIO leh SAPIO-te chu an mawhphurhna pawimawhzia hria a, ṭha taka RTI Act hmanga zawhnate chháng ṭhin tur leh RTI Act kenkawh kawngah an hriatfiah duhte MIC-ah zâwt hreh lo turin a chah.

Zirhonaah hian Lunglei district-a DAA, SPIO leh SAPIO-te an tel a, bawrhsap Kulothungan A, IPRO C Lalremruati leh Account & Treasuries joint director Thara Lungtau ten kalkhawmte an zirtir a ni.