Police-in fimkhur turin mipui an chah

Mizoram Police chuan nimin khan mipui hnena thuràwn an tichhuak a; hna thawktu la ṭhinte fimkhur taka chian hmasa tur leh finfiah hmasa ṭhin turin Mizoram mipui an chah.

Police thuchhuah chuan, "Hna pek tura an sawi rêng rêng pawm hmain hriat tur mamawh zawng zawng, hnathawh tur sawifiahna te, company chungchang te, a awmna hmun te, hna thawh dan tur kal hmangte leh thil dangte hre chiang hmasa phawt zel turin mipui kan chah a ni," a ti.

Police thuchhuah tarlan danin, tun hnaiah Myanmar hmarchhak ramri hmun kilkhâwr tak taka inbun, information technology (IT) thiamna hmanga inbumna hrang hranga inhnamhnawih ṭhin IT company ṭhenkhatin IT sector-a hna thawh tur ṭha tak awm anga sawiin an thawhpui hna la ṭhintute kaltlangin hmun hrang hranga India mi hnathawk tura bumin an la ṭhin tih hriat a ni.

India mi, hna thawk tur an lakte chu dan lo leh lehkha pawimawh awm mumal loin Myanmar ramah an hruai lût a, an âwk zui a, dinhmun khirhkhàn takah an dintir ṭhin a ni.