Tualchhung rorelna chungchang zirhona nei

Minister of state K Lalrinliana chuan nimin khan State Institute of Rural Development & Panchayati Raj (SIRDPR) hmunah 'Orientation Training of Young Fellow and Officials of Model GP Clusters' a hawng a; LAD leh SIRDPR buatsaih 'Mizoram tana inrêlbàwlna ṭha' (Local Governance in Mizoram) tih lehkhabu a tlangzarh.

K Lalrinliana chuan, tualchhung inrêlbàwlna ṭha a awm theih nan thawktute leh mipui ṭanho ṭhat a pawimawh thu a sawi a, "Thingtlang hmasawnna tak tak awm tur chuan tualchhung sorkar - village council-te kan chher hriam a, hmasawn duhna thinlung kan neihtir a pawimawh," a ti.

Gram Panchayat Development Plan (GPDP) siam uluk a pawimawh thu sawiin K Lalrinliana chuan, "Mizorama VC-te'n hma an sawn a, tualchhung rorelna ṭha a awm theih nan tuna kan dan hman mek, The Lushai Hills District (Village Councils) Act, 1953 chu tun dinhmun nena inmil tawh lo tam tak a awm avangin The Mizoram (Village Councils) Bill, 2022 duan thar a ni a, Law & Judicial department-ah an zir chian atan thehluh tawh a ni," a ti a; VC-te tichak a, hma an sawn theih nan hma la zel turin kal khawmte a chah.

Training-ah hian cluster enkawltu faculty, young fellow, BDO pisa leh DLAO pisa aṭangin mi 17 an tel a ni.