Covid-19 vei enkawl lai an tlem tial tial

September 21, Nilaini khan Mizoramah Covid-19 vei mi 21 hmuh chhuah a ni a, nimin khan hripui vei dam tawh mi 35 chhuahtir an ni. Covid-19 vanga thi an awm belh lo a, nimin tlai khan Covid-19 positive enkawl lai mi 172 chiah awmin, an tlem tial tial.

Nilainia hripui vei hmuh thar mi 21-te chu mipa pakua leh hmeichhia 12 niin, RAT hmanga hmuh chhuah vek an ni a; swab sample 286 endik aṭanga positive zat chu 7.34% a ni.

IDSP record angin, Mizoramah Covid-19 vei 2,38,189 hmuh chhuah a ni tawh a, mipa 1,10,948 leh hmeichhia 1,27,241 an ni a, mipa aiin hmeichhia 16,293-in an tam zawk. Nimin tlai dar 5 thleng khan mi 2,37,294 (99.62%) chhuahtir an ni tawh a, mi 723 (0.30%) thi tawhin, enkawl mek mi 172 (0.08%) an awm.

Siaha leh Hnahthial district-ah Covid-19 vei enkawl lai an awm tawh lo a, Kolasib district-ah mi pakhat, Lawngtlai district-ah pahnih leh Champhai district-ah panga chiah an awm. Active case tamna ber Aizawl district-ah mi 67 an awm a ni.

Kum 2011 chhiarpui angin, Covid-19 vei hmuh tawh 2,38,189 chu state mipui zat aṭangin 21.71% a tling a, India rama state zingah a sang ber. Mi 1,000 zelah positive 217 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.