KHAWTHLIR
Rescue Home Day
Synod Rescue Home chuan September 21, Nilaini khan an chapel-ah Synod Rescue Home Day vawi 35-na an lawm a, Synod senior executive secretary Rev. C Zorammawia'n a hmanpui. Synod Rescue Home-ah hian thawktu 29 leh damlo mi 54 (mipa 49 leh hmeichhia panga) an awm mek a; damlo enkawl tawh zawng zawng chu 6,464 an ni.
'Zoram harh rawh'
Kolasib district bawrhsap John LT Sanga kaihhruaiin nimin khan sorkar department leh páwl aiawhte'n DC conference hall-ah Mizorama HIV vei pung zel vênna tura Mizoram AIDS Control Society leh Central YMA ṭangkawp buatsaih 'Zoram harh rawh campaign' inelna kalpui dan tur an sawiho. Inelna hi November 15-19, 2022 chhunga neih tur a ni.
RTI Act inzirtir
Siaha IPR conference hall-ah nimin khan Siaha district-a SPIO leh ASPIO-te tan RTI Act, 2005 chungchang zirhona buatsaih a ni a, district bawrhsap Lalsangliana'n a hawng. Training-ah hian RTI Act & Rules leh online RTI chungchang inhrilhfiah a ni a, vawiinah chhunzawma zawh a ni ang.
Computer pe
Aizawl West-III bialtu MLA VL Zaithanzama chuan September 21, Nilaini khan a bial chhunga Mission Vengthlang Middle School a tlawh a, sikul hotute nen an inkawm bakah, computer a pe. MLA chuan, zirna a ngai pawimawh tih sawiin, "Zirna-in hi ram hmasawnna bulpui thlentu a ni a, ram hnuk a nih avangin a hniam ber aṭanga a sang ber thlengin kan hlamchhiah thei lo," a ti. VL Zaithanzama hian kumin Joint Entrance Exam-a India rama 78-na leh tribal zinga ti ṭha ber Angeline Lalpekhlui, Mission Vengthlang hnenah laptop a pe bawk.
Rûl chanchin zir
Mamit College chuan nimin khan an college-ah Mizorama rûl chungchang zirhona an buatsaih. Zirhona hi Mamit College-a assistant professor Dr Alexander Lalrinzama'n a kaihruai a; environment activist Romalsawma, MZU Zoology department research scholar Michael Vanlalchhuana leh Lalbiakzuala ten thupui hmangin thil pawimawh an zirtir a ni.