KHAWTHLIR

MCS Sports
Mizoram Civil Service (MCS) chuan nimin aṭang khan Sports & Cultural Association Annual Sports Meet an ṭan a, R Dengṭhuama Hall-ah MLA Hmingdailova Khiangte-in a hawng. MCS-te hi sport discipline paruk - badminton, table tennis, chinese checker, shooting, chess leh carrom board hmangin an intihsiak dawn a ni.

Leiminin in hnâwl
Thawhṭanni zan zanlai vel khan Bawngkawn leh Durtlang inkar, Haflong an tih hmunah kawng chhak lam a min a, Assam type in pakhat a hnâwl bakah, Bawngkawn-Durtlang kawng a hnawh ping. Thu dawn danin, leimin lai hian in a hnâwlah awm an awm lo a, bungrua erawh an chuh hman lo thung. Kawn ping hi nimin khan PWD lamin an thian nghal a, khawtlangin in chim an senghawi bawk.

DC-in enfiah
Mizoram State Sanitation Task Force hnuaia khawpui fai thlan tur atana inbuatsaihna kal mekah, Mamit khawpui chhunga veng hrang hranga hmalaknate nimin khan DC Lalbiaksangi hoa enfiah a ni. Bazar hmuna bawlhlawh paihnate chu felfai leh zuala enkawla sawngbawl turin bazar awmna veng V/C-te chu lo enzui pui tura tih an ni.

Industry campaign
Ministry of Micro Small and Medium Enterprise (MSME), Aizawl Branch leh World Vision India, Chhimtuipui area ṭangkawp chuan nimin khan Lungleia IPR pisa conference hall-ah Industrial Motivation Campaign an buatsaih. He hunah hian Lungleia self help group hrang hrang leh industry buaipuitute an tel a ni.

Tlân dawn lo
Champhai Maxicab Owners Association leh Drivers Association chuan thuchhuah siamin, kawng chhiat lutuk avangin vawiin, Nilaini aṭanga September 16, Inrinni thleng Champhai leh Aizawl inkarah maxicab-te an tlantir dawn loh thu an puang a, "Kawng chhiat vanga harsatna kan tawhte mipuiin min hriatpui theihna atan ni li chhung kan châwl dawn a ni," an ti.