Khuain a zir veleh kawng siam hna Thawh ṭan a ni ang - Chief Minister

PWD enkawltu, chief minister Lal Thanhawla chuan sorkarin kawng siam a ngaihthah loh thu a sawi a, "Khuain a zir veleh kawng siam hna thawh ṭan a ni ang," a ti.

Mizoram Road Fund Board-te nimina CMO conference hall-a an ṭhutkhawmnaah Chief Minister chuan, "Sorkarin kawng siam a ngaihthah lo. Mizoram sorkar chuan state ṭhang lai, Mizoram angte tana kawng pawimawhzia a hre chiang em em a ni. Khuain a zir veleh hna thawh ṭan a ni ang," a ti a; kawng siam turin PWD an inpeih reng tawh thu a sawi.

Lal Thanhawla chuan, kum dang ang lo takin kuminah March thla tìr aṭanga ruah a tlak chhunzawm avangin alkatra luan kawng siam leh kawng thawm ṭhat hrim hrim a harsa tih a sawi a, "Kawng siam bakah, kut hnathawktute thlengin lo hâl thuhlaah harsatna a awm a ni.

Ruahtui tam luat avanga harsatna tam tak a thleng hi a pawi tak zet a ni," an ti.

Kawngpui chu sorkarin mipui tan a siam tih sawiin CM Hawla chuan, "A chhiat pawhin a neitu chuan mawhphurhna rilru nen a theihna zawnah a enkawl leh a venhim a

ṭul. Mi tlawmngai tam tak, kawngpui thawm ṭhat hnatlang, neitu rilru pua lo thawk ṭhin zawng zawngte chungah thinlung takin lawmthu ka sawi a ni," a ti a; kawng dunga lirthei sil, sahbawn phuan leih buak, insûk leh kawngpui chhuata thîr tlâwn chhutte khauh zawka khap a ṭul thu a sawi.

Mizoram chu leilung tháwl leh lung chang ṭha, kawng siamna tur awm lohna hmun a ni tih hriat a ṭul thu sawiin Chief Minister chuan, "Kawngpui tam zawkte chu lirthei ke pali nei tlan theihna âwrha rinawm tura siam a ni ṭhin. Tunah lirthei lian zawk, ke 10 chung lam neite'n an zawh reng takah chuan kawngin a dâwl ta lo a. PWD mithiamte'n kawng tlo zawka siam a nih theih nan theihtawp an chhuah mek a ni," a ti.

Finance minister Lalsawta chuan, Mizoram vanneihna chu vantlang inlungrual leh tlawmngai pawlte an nih thu sawiin, "Anni an tel theihna tura kawng siam leh hmalakna tam zawka ruahmanna siam a ṭangkai hle," a ti a; mipui vantlang leh tlawmngai pawlte kawng siam, leh venhimnaah thûk zawka an tel theihna tur ruahmanna siam ni se a duh thu a sawi.

PWD secretary Lal Ramthanga chuan, PWD-in sorkar laipui aṭanga kawng siamna sum a dawn dan te, enkawlna atana sum a neih te, hna thawh a nih dan te, harsatna awm te, hna thawhna tur sum duhkhawp lohnate leh hmachhawpte a lem nen a sawifiah.

Lal Ramthanga tarlan danin, kawng leh lei enkawlna sum chu PWD-in budget head-ah 3,054 an dawng a, kawng siam ngai leh lei siam ngai chungchang chu ruahmanna fel taka siamin PWD Division-te'n an thehlut a ni. Ruahmanna leh sum lutte chu Chief Engineer (Planning) office-in a ngaihtuah hnuah work order siamin, PWD Division-te chu hna thawh tur pek an ni. State budget hmang hian kawngpui km. 4,662-a thui leh lei 105 an enkawl mek.

Kumin June thla thlenga PWD-in kawng leh lei chhia report a dawn zat chu, lei min/tawlh 984, kawngpui tlabal 81, retaining wall chim 40 vel leh culvert chhia 94 a ni.

Mizoram Road Fund Board-ah hian Chief Minister chu chairman a ni a, vice chairman chu Chief Secretary niin, member secretary chu PWD Secretary a ni. Member dangte chu - Finance, Planning, Law & Judicial, Transport, Land revenue & Settlement, Taxation leh PWD-a Secretary ṭheuh bakah, PWD Engineer-in-Chief, Chief Engineer (Roads, Highways & Building), AMC Commissioner, IGP, Transport Director te an tel a; stakeholder aiawh mi pathum leh NGO aiawh mi pali an tel bawk.

MRFB meeting-ah hian hna thawhna tur sum hmuh theihna tur ruahmanna sawiho a ni a; MRFB-in fund source & collecting agent zinga a rin luh leh kawngpui chhawr rim deuh enkawltu department leh body-a thlan chhuahte chu - Transport, Taxation, PWD, Home, Environment, Forest & Climate Change, Geology & Mineral Resources leh AMC-te an ni. Heng department leh body-te'n chhiah (cess, tax, fee, royalty leh fine) aṭanga sum an chhûn luh zinga a ṭhen azar chu MRFB-in kawngpui enkawl nan a hmang thei dawn a ni.