Sik leh sa inthlak chungchang zirna buatsaih

Swiss Agency for Development and Coope­ration (SDC) hnuaia Indian Himalayas Climate Adaptation Programme (IHCAP), Mizoram Science and Technology department, Mizoram State Climate Change Cell, Mizoram Science & Technology and Innovation Council (MISTIC) leh Centre for Media Studies (CMS)-te chuan nimin khan Aijal Club-ah 'Media workshop in climate change' an buatsaih a, Governor Lt.Gen. Nirbhay Sharma-a'n a hawng.

Governor chuan, sik leh sá inthlak chungchang chu kum tam tak kal ta aṭanga hriat a ni tawh tih sawiin, "Khawvel lum zel avangin Himalaya tlanga vûrte a tui ral tial tial a, tuifinriat chîm chin a sang chho a, ruahsur dante pawh a mumal tawh lo a ni," a ti.

Mizoramah pawh sik leh sa inthlak danglam vangin ruahsur hun chhung a rei a, ruahtui a tam tial tial tih sawiin Larsap chuan, "Tui tlan turah harsatna kan tâwk a, kan thlai chinte'n an chhiatpui a, natna hrik a pung a, mipui kan hrisel tur angin kan hrisel thei lo a ni," a ti a; awareness siam chungchangah chan­chin­bumite'n mawhphurhna lian tak an neih thu a sawi.

Planning minister Lalsawta pawhin thu sawiin, sik leh sa inthlak vangin kumin January leh May inkarah boruak danglam tak a thlen thu a sawi a, "February aṭanga ruah a la tlak chhunzawm avangin, mi tam takin an eizawnna an hloh phahin, nunna hial an chàn phah a ni. Thil thlengte hi mimal tute emaw tihsual vanga thleng a ni lo a, kan zavaiin mawh kan phur a ni," a ti.

Workshop hi vawiin leh naktuka chhunzawm tura ruahman a ni a, mahse, vawiinah total bandh huaihawt a nih dawn avangin programme siam danglam niin, vawiina programme tur chu naktukah hman a ni ang. Workshop chhungin mithiamte'n thupui hrang hrang an sawi dawn a, hmun hrang hrang tlawh a ni bawk ang.