Val Upa Council chairman Lalfakzuala

Zoram Peoples' Movement (ZPM) Val Upa Council member-te nimina Aijal Club-a ṭhukhawm chuan an chairman atan Lalfakzuala, IAS (Rtd.) an thlang.

ZPM Val Upa Council member-te hian chairman bakah hian, vice chairman-ah Lalremsiama, IPS (Rtd.) leh secretary-ah Prof. Thangchungnunga an thlang a; member-te chu KL Lianchia, Dr B Thangdailova leh C Laitanga te an ni.

Val Upa Council leh Steering Committee-te chu nimin vek khan an ṭhukhawm a, hmalakna tur leh an kalphung tur hrang hrangte an sawiho a ni. Meeting-ah hian ṭangrual pawla political party pahnih - ZNP president Lalduhoma leh MPC Sr. Vice President Vanlalhlanate pawh an tel.

Lalfakzuala chuan, Mizoram mipuite'n ZPM an thlir mek tih sawiin, "Mipuite hian mark min la pe lo a, kan lungrual dan azirin rin ngam kan hlawh ang. Kan lungrual phawt chuan min nghak reng tih a lang tawh e," a ti.

ZNP president Lalduhoma pawhin thu sawiin, "Mahni ṭheuh chuan inchhuang tur pawh kan awm lo. Mahse, kan intelkhawm chuan elh tliah zawh lohin kan ding chhuak ang tih a rinawm," a ti a; mipui sorkar an din tur thu a sawi.

MPC senior vice president Vanlalhlana chuan an thawhhonain lungrualna a hring tih sawiin, "Kan chakna hnár chu thinlung taka kan thawhhona hi a ni," a ti.

ZPM chuan sorkar kalphung thar din an tum thu tarlangin, "Chu chu mimal thunei fál awmna ni loin, committee rorelna (collective leader) kalphung a ni. Hei hi kan hmang thiam a ni tih kohhranin kum 100 chuang a lo hman tawh aṭang hian a lang fiah hle," an ti.

ZPM tarlan danin, Val Upa Council mawphurhnate chu - ZPM uaptu, sorkar khalh ngiltu, thuràwn petu, zilhhauh ngaite zilhhautu; Steering Committee-in emaw, sorkarin thu harsa an neihte chu Val Upa Council-ah an thlen ang a, an thutlukna chu thu tàwp a ni ang; candidate rinawmna thutiam tir bakah ṭul an tih chuan Val Upa Council member ruat belh te a ni.