MPC leh ZNP thalaite'n eiruknate CBI chhuitir turin sorkar an phût

MPC leh ZNP ṭhalaite chuan nimin khan MPC party pisaah thuthar thehdarhtute an kâwm a; Congress kaihhruai sorkar chu tuna an term zawh hma ngeia CBI ko lut a, kum 1999 aṭanga tun thlenga thil dik lo lian zawng zawng chhuitir turin an phût tih an sawi.

MPCY president V Lalṭhazuala chuan, Mizorama eirukna leh dik lo taka mipui pawisa kal ralna hrang hrang - lottery scandal, zangnadawmna, BAFFACOS, kêl pal hungna, toilet van, police modernization, Referral Hospital, OPD chhâwng kim lo, Mizo Carbon Product, high protein biscuit supply, Mizoram Building & Other Construction Workers Welfare Board leh NIAS, Di­hmunzawla PHE in ṭhiah, Bawngkawna Lal-ṭhai (LRM) ram lei leh hralh chungchang leh inpuhmawhna dang tam takte chu mipuite'n an ning hle niin a sawi.

V Lalṭhazuala chuan, MNF leh Congress party-te chu sorkarna an chan loh laia CBI koh luh duh inti ve ve an ni a, mahse, thuneihna an chan laia ko lut duh loah a puh a, "Political advantage atan mai maia mipui lama ball an vawrh ṭhin hi a huatthlala em em. Congress sorkar hian term an hman zawh hma ngeiin kum 1999 aṭanga tun thlenga thil dik lo lian zawng zawng chhui chhuak vek tura CBI ko lut ngei turin kan phût a ni," a ti.

MPCY President sawi danin, MNF party hruaitu lawk ṭhenkhatin eiruk thubuai an nei mek a; MNF president Zoramthanga'n eiruk thubuai - Aii Pûk leh Agriculture chung­changah leh sum lak luh leh thil neih inphû lo thubuai a nei a, MNF vice president Dr R Lalthangliana'n sum lak luh leh thil neih inphu lo thubuai a nei bawk. Heng thubuaiahte hian Anti Corruptuion Bureau (ACB)-in chargesheet an thehlut tawh a ni.

ZNP ṭhalai vice president Saiṭhuama chuan, Central Bureau of Investigation (CBI) chu Delhi Special Police Establishment Act, 1946 hmanga din, Central Vigilance Commission hnuaia awm a ni tih sawiin, "Sorkar laipui leh Delhi sorkara sum tihchingpente chhui tura din a ni a, state sorkarin an state chhunga hna thawh an phalsak chuan state sorkar thil tih pawh a chhui thei," a ti.

Saiṭhuama sawi danin, June 27, 1990-ah Mizoram sorkarin CBI-te Mizoram pumpuia hna thawh phalna a pe. Sorkar laipui pawhin November 15, 1990-ah hriattirna chhuahin, CBI chu Mizorama hma la turin a hrattir a; CBI chuan Govt. Complex, Aizawlah pisa hawngin hna thawk turin an inbuatsaih a ni.

CBI chuan hna an thawh tak tak dawn a, mahse, Congress sorkar chuan Mizoramah CBI-in an duh ang anga hna thawh an phalsak loh thu leh sorkar nena inráwntlang chauha hmalak an phal sak thu December 8, 1995-ah sorkar laipuiah a thawn a ni. MNF sorkar pawhin July 15, 2002-ah government gazette chhuahin, CBI-in Mizoramah hna an thawk dawn a nih chuan, eng chungchang pawh ni se, Mizoram sorkar phalna an la hmasa ngei tur a ni tih a tarlang.

Saiṭhuama chuan, October 1, 2007-a Khatla bialtu pastor tualthihna chu khatih laia opposition, Congress party-in an sorkar chuan a chhui turin CBI koh luh an tum thu an aupui ṭhin tih sawiin, "An sorkar term hnihna ral dawn tawh thlengin CBI ko luta an chhuitir kan la hre lo," a ti. MNF party-in lottery scandal leh Mizo Carbon chungchang CBI chhutir tura Chief Minister an phutnaah, CM Lal Thanhawla'n tifel tawh anga a insawi laiin, CBI ko lut tura ngenna chu a sût tawh tih a sawi bawk.