MNF MLA-in Kawnpui-Buichali kawng a enfiah

MNF general secretary Lalruatkima, MLA leh MNF ṭhalai hruaitu ṭhenkhatte chuan nimin khan Kawnpui leh Buichali inkara NH-54 kawngpui an enfiah a; kawng hi a chhiat em avangin truck driver-te an mangang tak zet niin an sawi.

MNYF tarlan danin, Kawnpui - Buichali inkar kawng laih hi package I leh II-ah ṭhen a ni a; package-I chuan Kawnpui aṭanga km. 15 thleng a huam a, package II-in Pualhrang lui thleng (km. 15) a huam thung. Package-I siam nan Ministry of Road Transport & National Highway-in cheng vbc. 61.71 a ruahman a, package-II siam nan vbc. 67.57 a ruahman a ni.

Kawng siamna tur senso zawng zawng original estimate (OE) chu cheng nuai 12,413 a nih laiin, ṭum hnih lai ennawn (revise) a nih hnuah cheng nuai 17,198 a tling tawh a; original estimate (OE) aia revised estimate (RE) tamna chu cheng nuai 4,785 a ni. Kilometre khat siam nan cheng nuai 580 vel zel sêng ang a nih thu an tarlang.

Kawng siam hna hi ABCI Infrastructure Pvt. Ltd, Silchar-in July 23, 2009-ah an thawk ṭan a, siam zawh hun tur chu July 22, 2011 ni mah se, zo hman loin, zawh hun tur chu ṭum sarih an pawtsei a, November 1, 2015-ah siam zawh a ni.

MNYF thuchhuah chuan, "Heti khawp­a sum senna tam, vawi khat mai ni lo, vawi hnih lai revise estimate siam, siam zawh hun pawh vawi sarih ngawt extend ngai khawpa uluka an siam kawngpui chuan fûr hnih êm pawh a daih ta lo a, he kawnga tlan ṭhin lirthei, a bikin truck driver-te an mangang tak zet a ni," a ti a; kawngpui chhiat vanga mipuite an mang­ang chu a changtu CM Lal Thanhawla leh vai company-te'n sam inphiarzawmna an neih vanga an ngaih thu a tarlang.

MNF ṭhalaite chuan, September 4, 2017 aṭanga Hachhek Constituency Maxicab Welfare-te kawng chhia vanga an service loh avangin, Hachhek bial chhunga oil palm chínga eizawngte'n harsatna naménlo an tâwk nia sawiin, "An harsatna a rang thei ang bera sut­kiansak turin sorkar kan phût a ni," an ti.