Lirthei indin chhawkin a huam loh tur bithliah

State Traffic Management Committee in Working Group Committee chu nimin khan convener Lalbiakzama, Home additional secretary hoin Traffic SP pisaah an ṭhukhawm a, lirthei indin chhawkin a huam loh turte an rel.

Lirthei indin chhâwkin a huam loh turte chu - Governor, Chief Minister leh Speaker-te motor, police, security force, department despatch rider, city bus, taxi, department bus, two wheeler taxi, fire service, bawnghnute sem, institution bus, maxicab, magistrate leh department-a emergency duty-te a ni.

Coordination Committee on Traffic Management tun hnaia an chairman R Lalzirliana, Home minister hoa Chief Secretary conference hall-a ṭhukhawm chuan October 2017 aṭangin mimal leh sorkar lirthei zawng zawng a inchhâwka tlantir an rél a; lirthei din ni-ah hian zing dar 8:30 aṭanga tlai dar 4 thleng lirthei din tura tih number-te chu an din a ngai dawn a ni.

Lirthei indin chhawk hi October thla chhung enchhin a ni dawn a, mimal leh sorkar lirthei zawng zawng a inchhâwkin an tlan ang. Ruahman dan chuan, lirthei number, a digit tawp ber chu thla khata ni indawta an number a thlen apiangin an tlan chhuak thei dawn lo.