MZU-a indan titawp lailâwk rih dawn

Mizoram University (MZU)-a vice chancellor (VC) nghet dah tura phûtna chungchangah MZU-a pawl hrang hrangte chuan, MZU Students Council (MZUSC)-in MZU-a thil tih tur reng reng an dan mek chu September 15, 2017 kalpui a, September 18 aṭangin indan tihtawp a, badge dum bel chunga zirna chhunzawm an rel.

VC nghet dah phût chungchangah hian nimin khan MZU-a pawl pathum - MZUSC, MZU Teachers' Association (MIZUTA) leh MZU Non-Teaching Staffs Association MUNTSA) hruaitute chu nimin khan an ṭhukhawm a; kal zel dan tur an rel a ni.

Meeting-a an rel dan chuan, MZUSC hruaitute leh Lok Sabha MP CL Ruala telephone-a an inbiakna aṭanga an hriat danin, CL Ruala chu HRD minister Prakash Javadekar nen an inbia a, VC ruatna file-in India President a thleng tawh a, ni 15 vel chhungin Ministry of HRD-ah a let leh hman beisei a ni. Mahse, ṭawngka chauh a nih avangin, an inbiak ní, September 11 aṭanga ni 15 chhung (working day chauh) chu badge dum bel chunga zirna leh hna chhunzawm phawt an rêl a ni.

Badge dum bel chunga zirna leh hnathawh chhunzawm rel mah se, MZUSC-in an rêl tawh angin, MZU main gate chu September 15 thleng khar chhunzawm an rel a, September 18 aṭangin tihtawp lailawk an rêl a; chu chuan September 29 thleng a awh phawt ang.

September 29 thlenga HRD aṭanga chhanna mumal hmuh a nih loh chuan Joint Committee-in an kal leh zel dan tur an rel ṭha leh dawn a ni.