Bawngkawna ram hralhna sum MPYCC leh NSUI-in pek let phût

Congress party ṭhalai, Mizoram Pradesh Youth Congress Committee (MPYCC) leh Congress zirlai pawl, National Students Union of India (NSUI)-te chuan, Bawngkawna Lalṭhai ram, MNF President hminga land lease siam chu mi dang hnena hralh a nih avangin, a hralhna man Rs. 1,50,00,000 chu pe lêt turin MNF President an phût.

MPYCC leh NSUI Mizoram-te hian nimina an ṭhukhawm hnuah MPYCC president Vanlalawmpuii Chawngthu leh NSUI president Lalhmachhuana te hmingin MNF President hnenah lehkha an thawn a; MNF general headquarters President hminga land lease siam chu Certificate of Land Lease No. 117 of 2005-ah, hralh emaw, mi dang pek chhawn theih a ni lo tih a chuan avangin, mimal hnena hralhna sum cheng nuai 150 chu pe lêt turin an ngen a ni.

MPYCC leh NSUI tarlan danin, Certificate of Land Lease-a 'Terms and Conditions' point no. 4-ah chuan, ram chu a pumpui emaw, a ṭhen lai emaw hralh leh mi dang hnena pek leh hlan phal a ni lo tih a chuang a; point no. 5-ah ram chu 'leased' anga hman a nih tawh loh chuan sorkara pek tur a ni tih a chuang.

Pawl pahnihte chuan, ram chu mi dang kuta hralh leh pek phal a ni lo chunga MNF hruaitu ṭhenkhatin kawngpui zauhna tur an lo hralh c pawi an tih tak zet thu an sawi a, "Mipui ram hi a nihna tur dik taka hman a nih ngei theih nan an hralh­na man pe lêt a, sor­kar hnena ram hi hlan leh turin kan phût a ni," an ti.

MPYCC leh NSUI chuan, land lease dik lo taka hralhtu MNF president Zoramthanga chu mipui hnena ngaihdam dil turin an phût bawk.