KHAWTHLIR
Climbing Wall
Hawla Indoor Stadium, Republic Vengthlanga dah thar, artificial rock climbing wall chu nimin khan Sports & Youths Services minister Zodintluanga'n a hawng. Sports Minister chuan, adventure sport lama tui mite tan rock climbing wall thar hawn a ni ta chu lawmawm a tih thu sawiin, "Hun rei loteah he discipline-ah hian ram aiawh a chhuak thei mithiam tam tak chher chhuah a nih ngei ka beisei," a ti. Climbing wall hi kum 2014-15 chhung khan Special Plan Assistance (SPA) fund aṭangin Rs. 46,68,825 hmangin siam a ni a, ft. 52-a sang a ni.
CM-in hawng
Rashtriya Uchchatar Shiksha Abhiyan (RUSA) sum, cheng nuai 140 sênga Hrangbana College-a Golden Hall, conference hall, practical room leh class room thawm ṭhatte chu Thawhlehni khan chief minister Lal Thanhawla'n a hawng. Hrangbana College-ah hian thawktu 83 leh zirlai 1,758 an awm mek a ni.
Lei himah ngai
PWD chuan thuchhuah siamin, Keiṭum leh Arṭahkawn kawnga Tuichang lei innghahna (foundation) tlahniam nia hriat chu PWD Serchhip Division-a engineer-te'n an endik tih an tarlang a, "Lei innghahna hi a tlahniam lo a, lei kaina (approach) zawk a tlahniam deuh. Siam ṭhat ngai laite siam ṭhat a ni a, lei hi a him," an ti.
ODF-ah puang
Serchhip District Sanitation Task Force chu an chairman, DC Sangchhin Chinzah hoin nimin khan a pisa-ah an ṭhukhawm a, Serchhip khawpui chu inthiarna mumal nei lo awm lohna, Open Defecation Free (ODF)-ah an puang. Meeting-a tarlan danin, Serchhip khawpui ODF-a puan a nih theih nan hian hun rei tak hmalak a ni tawh a, August 2017 tìr khan ODF-ah an inpuang thei ta a ni.
Bandh dem
MPC party chuan thuchhuah siamin, MNF-in mipuite nunphung tikhaihlak zawnga vawiina Mizoram puma total bandh huaihawt an tum chu an dem tak zet thu an tarlang a, "Mizo mipui thamlohna leh rahbehna lian takah kan ngai," an ti.