ZPM a sorkar chuan MLA-te hamṭhatna ennawn a ni ang - Duhoma

ZPM leader Lalduhoma chuan, ZPM-in sorkarna an chan chuan inrenchemna an kalpui dawn thu leh, MLA-te'n sorkar aṭanga hamṭhatna an dawn an ennawn ang a, a zatveah an tihhniam dawn thu a sawi.

Lalduhoma hian nimin khan Mizoram University-a Political Science department buatsaih, Political Talk-ah thu sawiin, rorelna dik leh sorkar ṭha siam turin politician-te'n hma an hruai tur a nih thu a sawi a, "ZPM kan sorkar chuan inrenchemna kan kalpui ang a, MLA-te'n sorkar aṭanga hamṭhatna an dawn ṭhin kan ennawn ang a, a zatveah kan tihniam dawn a ni," a ti.

ZPM Leader chuan, "Pathian leh mipui zarah ZPM-in sorkarna a chan chuan system ṭha tak nen ram kan kaihruai dawn a ni," a ti a; Mizoramin kalphung ṭha a mamawh a, kalphung ṭha a awm loh avangin Mizoram a buai phah thu a sawi.

ZPM danglamna tur zawhna an dawng fo tih sawiin Duhoma chuan, "Party sorkar aiah mipui sorkar kan din tur ringawt pawh hian danglamna tam tak a nei nghal dawn a, chief minister-in works department a chang ve lo tur ringawt pawh hi danglamna a tling nghal. Tuna kalphungah chuan Chief Minister-in sum tamna department a chang a, CM-in PWD a chan chat chuan a hnár aṭangin a nu leh dawn tih hi hre lâwk ila, a dik ngei ngei," a ti.

Lalduhoma chuan, tun dinhmunah chuan sorkar chu mipui mimir tan dàwr a hahthlak lutuk tih sawiin, "Hei ringawt pawh hi siamṭhat a ngai a, awlsam zawka mipuiin an dàwr theih dan tur leh file pending tam lutukte hi chak zawka a kal theih nan file tracking device siamin hma kan la dawn. Contract inpek dan kan tidanglam ang a, Engineering, Procurement and Contraction (EPC) system-in a theih chen chen kan kal dawn a ni," a ti a; restricted tender chu dan ang takin an kalpui dawn thu a sawi bawk.

MZU Political Talk hi MZU Political Science HoD Dr Lallianchhunga'n a kaihruai a; ZPM aṭangin Lalduhoma bakah, working president K Sapdanga, MLA Dr Vanlalthlana leh general secretary Eddy Zosangliana Colney an tel a, zirlaite'n zawhna an neihte an chháng a ni.