Deputy CM-in Sailam WSS hawng

Deputy chief minister Tawnluia chuan nimin khan Sailam khuaa Zoluti Inpuiah Sailam Water Supply Scheme a hawng a; in tina tui thianghlim pek chhuahna tur Jal Jeevan Mission (JJM) chu Mizoramah kum 2023 tawp lamah zawh hman beisei a nih thu a sawi.

Tawnluia chuan, chêt thianghlim, khaw dái tihfai, faina leh thianghlimna lama ṭan lak a ṭul thu sawiin, "PHE hian tui thianghlim sem bakah, faina leh thianghlimna a keng tel. Thingtlang in tina tui thianghlim pekna tur sorkar laipui hmalakna JJM scheme hi kum 2024-ah zawh tura tih a nih laiin, Mizoram chuan hma a lak chak avangin kum 2023 tawpah zawh theih kan inbeisei," a ti.

PHE Minister chuan, Sailam chu chhum lo chat loa tui hnianghnâr taka dawng thei khua an nih thu sawiin, "Sorkar laipui pawhin a chhuang a, khaw entawntlakah a puang a ni," a ti a; Sailam khuaah mi tinin ni khatah tui litre 62 zel an dawng thei a, hman sèn loh an dawn thu a sawi.

Sailam Water Supply Scheme hi scheme pahnih hmanga thawh a ni a, ni khatah tui litre 60,000 lak theih a ni. Cheng nuai 18.72 ruahman a ni a, khuaa chhungkaw 167-te chu an inah tui connection pek vek a ni tawh a, eng lai pawhin tui herh haw theih a ni.

Sailam WSS hawn­naah hian bialtu MLA F Lalnunmawia pawhin thu a sawi.