Kan thawh theih rengah hnam dangin min chîm ral mek a ni - LESDE Minister
Central YMA buatsaih cement mistiri training chu nimin khan CYMA hall-ah khâr a ni. Khàrna hun hmanpuitu Labour, Employment, Skills Development & Entrepreneurship (LESDE) minister Lalchhandama Ralte chuan, Mizo in an thawh ve theih reng cement mistiri hnaah hnam dangin Mizote an chîm ral mek thu a sawi.
Lalchhandama Ralte chuan, cement mistiri zir zote chu ram leh hnam mamawh chhànna ni tur leh eizawnna atan hmang ngei turin a chah a, "Mizo mipui tana chhawr châkawm nih te, mahni invawng a, hna thawhna hmuna kal hma te, hlawhtling tura taima leh tei rei peih ni tur te, hlawh tlem deuh pawha bul ṭan peihte leh mi dang chher chhuak theitu nih tumte a pawimawh," a ti.
Cement mistiri hna, Mizote'n an thawh ve theih rengah hnam dangin Mizote an chîm ral mek tih sawiin Minister chuan, "Hemi laka ram chhantu ni thei tur hian training chhuakte in pawimawh. Hnam dangte aia chhawr nuam nih tum ang che u," a ti a; cement mistiri tan hnathawh dan phung a ṭhat phawt chuan thawh sên loh a awm thu a sawi.
Lalchhandama Ralte chuan, ram changkangah ṭhalaite hna thawk turin zing aṭangin an chhuak suau suau tih sawiin, "Hna thawk lo an awm lo. Kan ramah chuan ṭhalai zing karah an tho hlei thei lo a la ni si. Hna thawh dan phung siamṭhat a, ṭhalaite hna thawk lo thei loa siam a ṭul tawh hle," a ti.
LESDE secretary Lalramsanga pawhin thu sawiin, "Mizo ṭhalai hnathawk tura inchher hriam kan nei hi ram leh hnam damna tur a ni," a ti a; Mizo ṭhalai a tam thei ang ber hna thawk thei tura chher zel a pawimawh thu a sawi.
Central YMA hian cement mistiri training vawi 16, alluminium mistiri training vawi thum leh floor tile mistiri training vawi thum an buatsaih tawh.
Tun ṭuma training hi August 23, 2022-ah ṭan a ni a, ni 31 chhung theory leh practical-in an zir a, mi 48-in training an zo. Training zote chu certificate leh mistiri bungrua pek an ni.