Minister-in Kolasib damdawi-in sak thar tur lungphùm a phúm
Health & Family Welfare minister Dr R Lalthangliana chuan nimin khan Kolasib-ah khum 100 awmna District Hospital thar sakna tur lungphùm a phúm. Damdawi-in tihlenna tur hi North East Special Infrastructure Development Scheme fund cheng nuai 1859.87 hmanga sak tur a ni a, kum hnih chhunga zawh tur a ni.
Dr R Lalthangliana chuan, Kolasib district chu Mizoram luhkapui a nih angin District Hospital pantu an ṭhahnem tih a sawi a, "Kolasib district-a health centre-te health & wellness centre-a hlànkai ngai zawng zawng a taka kalpui vek a ni tawh, " a ti.
Health Minister chuan, damdawi-in thar sak tur chu thawhhona boruak ṭha tak karah a awm a beisei thu a sawi a; Health department-a thawkte chu inpekna thinlung púa thawk tur leh hmel hmuh nuam leh ṭawngkam ṭha ui lo turin a chah.
Bialtu MLA K Lalrinliana, minister of state pawhin thu sawiin, "Kolasib District Hospital hi kum 1896-ah khum pali awmin bul ṭan a ni a, kum 1978-ah khum 30 leh kum 1998-ah khum 60 awm theihnaah hlan kai a ni," a ti.