PRS Legislative Research chuan September 22, Ningani leh nimin khan Delhi-ah MLA-te tan National Workshop for State Legislators an buatsaih a, Mizoram aṭangin MLA paruk - L Thangmawia, H Biakzaua, Dr K Pachhunga, H Lalzirliana, Dr Vanlalṭanpuia leh K Laldawngliana te an tel.
Workshop-ah hian Covid-19 vanga sorkar laipui leh state hrang hrangte'n sum leh paia harsatna an tawh dan te, Covid-19 leh inkhârkhip vanga state hrang hrangte'n sum an pûk belh dante leh hripui lên hmaa GSDP aṭanga state sorkarte tana bat phal (fiscal deficit) zat bituk 3% chu hripui lên hnua tihpun a nih dante zirho a ni.
Sorkar thuchhuah tarlan danin, India ram state zingah GSDP aṭanga tehin Punjab-in leiba an ngah ber a, Mizoram chu India ram state zinga leiba nei tlem ber pawl a nih thu tarlan a ni.
State hrang hrang leiba chungchang zawtin Mizoram MLA-te chuan, Mizoram chu India ram state zinga GSDP aṭanga tehin leiba nei tlem pawl a nih avangin Mizoram sorkara Finance department enkawl tawhtu zawng zawngte leh tuna enkawl mektute thawh rah a lang mek zel nia an hriat thu an sawi.
Hriselna lama National Health Policy-in target a siam aia tlem deuh vek state zawng zawngin sum an hman thu te, khawvelin environment issue a buaipui zual zel a ṭul thute ngaihthlaka sawiho a ni bawk.