Mid Day Meal chaw thlêng a chhia - Congress party

Mizoram Pradesh Congress Committee (MPCC) chuan, primary school leh middle school zirlaite'n chawchhûn an dawnna Mid Day Meal hnuaia chaw thleng leh bungraw dang supply chungchangah thil fel lo lian tak a awm nia an hriat thu an puang a; chhui chianga a ṭul anga hma la turin sorkar an phût.

MPCC thuchhuah chuan, Mizoram sorkar hnuaia elementary school hrang hrang tan Mid Day Meal Scheme hnuaiah chaw thleng, fianpui leh dekchi liante tun hnaiah supply a nih thu a tarlang a, "Heng bungruate hi sem chhuah mai theih turin district hrang hrangah thawn kual a ni a, a nih tur ang aia tê leh chhia a nih avangin district project coordinator office-te'n sikulah an sem chhuak ngam lo a ni," a ti.

Mid Day Meal hmanga zirlaite'n a thlâwna chawchhun an ei theihna tur sum siamna atana hmang a, a nih ang tur ni lo bungrua pek a ni chu pawi an tih thu sawiin MPCC chuan, "Bungraw chhe tak petu hi NABARD loan hmanga sikul sak ṭhat hna tam tak thawktu, Education Minister ṭhian hnai tak, a consultancy firm hman thiam Allied Concern a ni," an ti a; a rang thei ang bera bungraw dik leh ṭha zawka thlâk thuai tur leh thil dik lo titute dan anga hrem ngei turin sorkar an phût a ni.