BJP, Mizoram Pradesh president Vanlalhmuaka chuan, Covid-19 léng avangin Mizoramah sum harsatna a awm lo nia sawiin, Mizoram sorkar sum harsat chhan chu sum enkawl thiam loh vang zawk a nih thu a sawi.

Nimina BJP pisaa inkhawma thusawitu Vanlalhmuaka chuan, chief minister Zoramthanga'n 'Made in Mizoram' aiin 'Made in India' ṭha a tih zawkzia a lang zel niin a sawia, "Ṭhenawm state-te'n BJP an sorkarpui a, an dinchhuahpui laiin, Pu Zoramthanga kaihhruai sorkar chuan hmai hnih neiin, leh lama awr sen, leh lama awr duma min kaihhruai avangin sum lamah harsatna kan tâwk mek. Covid-19 vangin Mizoramah sum harsatna a awm lo a, sum enkawl thiam loh vangin Mizoramah sum kan harsa zawk a ni," a ti.
BJP President chuan, "Kum 2023-ah BJP telna sorkar a piang tawh ngei dawn a, a piantirtu tur pawh Mizo mipui leh Mizoram mipui kan ni," a ti a; BJP sorkar chu mahni thutiama dinghet, miretheite lamṭang leh ngaihtuahtu a nih ṭhin thu a sawi.
Mizoram BJP President sawi danin, Lengpui Airport chu engti kawng mahin Airport Authority of India (AAI) kutah an hlan theih loh thu leh Mizoram chu India ram state zinga airport nei awm chhun a nih thu CM Zoramthanga'n a sawi ṭhin a; chutih laiin, tun hnaia Union Minister rawn zinin Lengpui Airport chu la turin Mizoram sorkarin AAI a ngen a, AAI hnena hlan turin inremna thuthlung duan mek a ni.

Vanlalhmuaka chuan, Zoram Medical College pawh Mizoram sorkarin a enkawl theih tawh loh avangin enkawl turin September 22, 2022 khan CM Zoramthanga'n Union Health Minister hnenah a thlen thu a sawi a, "Lengpui Airport a ni emaw, ZMC a ni emaw, ramri chungchangah a ni emaw, CM hian thu dik sawi ṭhin se, dinna nghet nei se tih hi kan phût a ni," a ti.