LMC draft roll-ah voter 40,265

Lunglei Municipal Council (LMC) draft electoral roll-ah vote nei mi 40,265 an awm a, chung zinga 19,028 chu mipa niin, 21,237 chu hmeichhia an ni. Mipa aiin hmeichhe vote nei 2,209-in an tam zawk.

LMC inthlana hman tur electoral roll ennawnnaa behchhana hman tur draft electoral roll hi nimin khan Lunglei district election officer (DEO) Kulothungan A, district bawrhsapin DC conference hall-ah a tlangzarh a ni.

LMC draft electoral roll-a sawisel duh leh siamṭhat tur nei tan leh inthun duhte tan Sept. 30, 2022 thleng hun hawn a ni dawn a; dilna lutte chu October 7, 2022-ah chinfel zawh tur a ni a, October 14, 2022-ah final roll tlangzarh a ni ang.

LMC-ah hian ward 11 a awm a, vote tamna ber ward-VIII (Ramthar Veng leh Farm Veng)-ah voter 4,306 awmin, voter tlemna ber ward-XI (Lungpuizawl, Zobawk North leh Zobawk South)-ah chuan voter 2,949 an awm a ni.