World Day of the Deaf hman a ni

September thlaa Pathianni hnuhnung ber hi World Day of the Deaf a ni a, Pathianni a nih avangin nimin khan Mizoram hmun ṭhenkhatah hman niin, thupui chu 'Building inclusive communities for all' tih a ni.

World Day of the Deaf hi Aizawl district-ah chuan Ephatha Special School, Kulikawnah hman a ni a; bialtu AMC councillor Baryl Vanneihsangi leh Persons with Disabilities (PwD) commissioner Vanlaldiki Sailo te khuallian niin, National Programme for Prevention & Control of Deafness (NPPCD) state nodal officer Dr Robert L Khawlhring chu chairman a ni.

Councillor Baryl Vanneihsangi chuan, "Beng ṭha lo leh bengngawngte inkiltawih leh inthlahrung loa an tel theihna khawtlang leh kohhran kan din a pawimawh a, hemi atan hian kan zavaia kan ṭan tlân a pawimawh," a ti. PwD commissioner Vanlaldiki pawhin, hna dilnaah pawh rualbanlote tan 4% hauh zel a nih tawh thu a sawi.

Dr Lalthanmawii Khalthang sawi danin, sorkar kum kal mek 2022-23 chhungin beng lama hartsatna nei endik leh enkawl mi 8,295 an awm tawh a; ri hriatna ṭha lo mi 1,254, bengdár vuah tura tih mi 529, beng zai mi 35, beng natna hmuh chhuah mi 5,622 an awm tawh a ni.