Mizo Heritage & Cultural Centre din rawt

Tourism minister Robert Romawia Royte chuan September 22, Ningani khan New Delhi-ah Culture leh DoNER enkawltu minister G Kishan Reddy a kâwm a; khualzin hîpna atan leh Mizo hnam ziaráng vawn nun zelna atan Mizoramah Mizo Heritage & Cultural Centre din a rawt.

Robert Romawia Royte chuan, Mizo Heritage & Cultural Centre dinna atan cheng nuai 2,000 sênna tur project report chu Mizoram sorkarin North Eastern Counci-ah a thehluh tawh thu Union Minister a hrilh a ni.

Tourism Minister chuan, Mizoram leh state pawna Mizo tamna hmuna Zo Kûtpui hmanna tur project pawh pawma sum pe ngei tur leh Mizoram Institute of Hotel Management a taka kalpui a nih theih nan Mizoram cabinet-in post a siam tawh thu a hrilh a, MIHM a taka kalpuina tura hmalak ngaiteah rawtna a thlen bawk.

Sorkar thuchhuah tarlan danin, DoNER Minister chuan, Robert Romawia rawtnate chu a lo bawhzui tur thu a hrilh a, Ministry of Culture sum pek tura Thenzawla event siamna tur rawtna chu pek nghal a nih tur thu a hrilh a ni.

Robert Romawia hian nimin khan Niti Ayog member Dr VK Paul leh official-te a kawm a, Mizorama sports leh tourism tihhmasawnna tur project an sawiho. He project hi cheng vbc. 2250 hu a ni a, sports leh tourism lama hmasawnna ruhrel chi hrang hrang siamna tur bakah training leh sports science lamte a huam dawn a ni.