KHAWTHLIR

Award dawng
Federation of Indian Chambers of Commerce and Industry chuan media kaltlanga smuggling leh counterfeit (thil lem) donaa hna thawk ṭha journalist paruk a thlang a, nimin khan Hotel Sangri-La Eros, New Delhi-ah award an hlan. Award dawng zingah hian editorial consultant , PTI (Aizawl Centre) Henry L Khojol telin, a tiṭha berah thlan a ni a, 'FICCI CASCADE Awards for Excellence in Journalistic Reporting on Smuggling and Counterfeiting Issues' hlan a ni.

Thisen pe
Nimin khan Pachhunga University College NSS chuan Civil Hospital, Aizawl tan thisen unit 66 an pe; thisen petute hi Science leh Commerce 5th semester zirlaite niin, mipa 60 leh hmeichhia paruk an ni. HBK MMA Gym, Kulikawn pawhin nimin khan Synod Hospital Blood Bank-ah thisen unit riat an pe bawk a, kumina thisen an pek ṭum thumna a ni.

NSS Day lawm
Mizorama NSS dinna zirna-in hrang hrangah nimin khan NSS Day vawi 53-na lawm a ni a, Aizawlah chuan Vanapa Hall-ah minister of state Lalruatkima hoin lawm a ni. Minister hian Sports Minister’s Trophy for Voluntary Blood donation a sem a, college huangah Pachhunga University College leh higher secondary school huangah Synod HSS chu pakhatna an ni.

CS-in kudam tlawh
Chief secretary Dr Renu Sharma chuan nimin khan Tanhrila Food Corporation of India kudam leh Muanna Venga FCSCA kudam a tlawh a, Muanna Veng leh Zuangtuia ration buhfai lakna ṭhenkhat a tlawh bawk.

Shikhar hâl ral
MHIP, Vairengte Block-in Sikhar an mante nimin khan an hâl a, hâlna inkhawm hi MHIP Gen.Hqrs president Ngurmawii Sailo-in a hmanpui.