Kawng chhia siamṭhat phût nan MNF-in total bandh an huaihawt

Mizo National Front (MNF) party chuan, nimin zing dar 5:00 aṭang khan Mizoram pumah 'Kawng chhe lutuk vanga mipuite thlavâng hauhna total bandh' an buatsaih a, tlai dar 3-ah bandh hi tihtawp (call off) a ni.

Zing dar 5 aṭangin MNF chuan hmun hrang hrangah duty an insiam a, buaina chhuak palh thei vengin police-te pawh MNF-te duty-na hmunah an an duty ve bawk.

Buaina chhuak a awm hriat a ni lo a, phalna nei lirthei bâk lirthei vei vak an awm meuh lo a, emergency thila damdawi-in pan ngaite chu chhuah an ni.

Bandh neih hun chhung hian dawr, zirna-in leh pisate an inkhâr a, state páwn aṭanga Mizorama lirthei lut pawh a awm lo. Bandh tihtawp a nih hnuah sumdawnna dawr ṭhenkhatte chu an inhawng a, sumdawnna lirtheite ṭhenkhat pawh an tlan leh a ni.

Bandh tihtawp a nih hmain MNF hruaitute chuan Mizo Hnam Runah thuthar thehdarhtute an kâwm a; MNF Action Committee chairman Tawnluia, MNF senior vice president chuan, total bandh an huaihawt chu mipuite'n an thlâwp ṭhat thu sawiin, "Min ṭawi­awmtu mipui zawng zawng chungah thinlung takin lawmthu kan sawi a, bandh vanga harsatna tâwkte lakah an hriatthiamna kan dil tak zet a ni," a ti.

MNF Senior Vice President chuan, kawng chhia vanga mipuite tawrhna a nasat tawh avangin mipuite thlàwpna an dawng ṭha nia sawiin, "Kawng ṭha nei tur chuan sorkar thlak a ngai a, kawng siam thiam MNF an sorkar a ngai a ni," a ti a; MNF chu mipuite thlavâng hauh tura a din zel tur thu a sawi.

Mizoram Road Fund Board (MRFB) ṭhutkhawm ṭuma Chief Minister-in, 'Khaw ṭhat ve leh kawng siamṭhat hna kan thawk nghal ang' tih a sawi chu an en zui zel dawn tih sawiin Tawnluia chuan, "MRFB-te hi an ṭhu chûk chûk a, hmãnah lo ṭhut daih tawh àwm a ni. Kan bandh neih tur khan a ko harh niin kan hria a, an hmalakna kan en zel dawn," a ti.

Tawnluia chuan, Mizoram kawng chhiat chhan chu corrup­tion vang liau liau a nia sawiin, "Contractor-te hnenah revise estimate vawi tam tak an siam nawn a, kawng siamna turin corrupt taka sum an siam ṭhin vangin kawng a chhia a ni. Chief Minister leh contractor-te'n sam an inphiar zawm tlat a, quality control leh monitoring an ti ṭha ngam lo," a ti a; kawng ṭha a awm theihna atan theihtawp an chhuah zel tur thu a sawi.

Mizoramin kawng chhia avangin kum 9 chhung harsatna an tâwk tawh tih sawiin Tawnluia chuan, nakkum inthlanah Mizo­ramin khawvar êng a hmuh ngei theihna tura theihtawp chhuaha hmalakpui turin Mizo mipuite a sáwm a ni.