Lalhriatpuii thih thuah mi 2 la hrêng mek ; Police-in Lalhriatpuii thihna an bawhzui

September 13, Nilaini zinga Bagha, Assam-a Lalhriatpuii (26) d/o LT Zauva (L), Chhinga Veng thia chhar chungchanga man, T Lalhmingliana s/o T Zaneihchhuma, Chhinga Veng leh Toibur Rahman Bhorbhuiya @ Rimpi (kum 40 vel) s/o Tahir Rahman Bhorbhuiya Rajgat part-I, Dholai , Bagha-te chu Dholai police-te'n an la kawl mek. He tualthihna hi Mizoram Police chuan an bawhzui mek a ni.

Chhinga Veng Branch YMA president C Lalnun­tluanga hnen aṭanga thu dawn danin, Lalhriatpuii tual­thih thu-ah hian a chhungte chuan September 13 khan Dholai Police Station-ah FIR an thehlut a; Lalhriatpuii te truck driver T Lalhmingliana leh an thlenna in neitu Rimti te chu police-in man nghalin, an kawl mek a ni.

C Lalnuntluanga chuan, Lalhriatpuii ruang chu doctor-te'n an endik thu sawiin, postmortem report pawh nimin tlai lamah hmuh theih a nih an beisei thu a sawi a; YMA hruaitu te, Local Council hotute leh khawtlanga paràwnte nen nimin tlai khan an hmalak zel dan tur ngaihtuahin an ṭhukhawm tih a sawi bawk.

Lalhriatpuii ruang hi Nilaini zan khan Aizawl panpui niin, Vairengte, Bilkhawthlir, Kolasib leh khaw dang­ahte mipuiin an lo hmuak a; nimin zing dar 4:20 khan Chhinga Venga an in thlenpui niin, nimin khan vui a ni.

Chhinga Veng Local Council leh an venga pawl hrang hrangte chuan thuchhuah siamin, an veng nula Lalhriatpuii tualthihna chu hriatthiam har an tih thu an tarlang a, "He thihnaa a mawhphurtu rang taka chhui chhuak a, a phu tâwk hremna pe ngei turin thuneitute kan ngen tak meuh a ni," an ti.

Chhinga Veng LC leh NGO-te chuan, Lalhriatpuii chu nula fel tak, Bangalore-a B.A zir zo chiah leh a chhungte innghahna a nih thu an tarlang a; Vairengte khawtlang, Bagha YMA, Silchar DRC leh Silchar-a Mizote'n an theih tawka Lalhriatpuii an lo buaipuinaah lawmthu an sawi bawk.

MZP pawhin thuchhuah siamin, Bagha-a Lalhriatpuii ruang chhar a ni chu pawi an tih thu leh a chhung­te an tawrhpui tak zet thu an tarlang a, "Hriathiam har kan ti hle a, hnam dang misual kut tuara boral ni ngeiah kan ngai nghet tlat a, a thihna a mawhphurtu a rang thei ang bera man chhuak tur leh an phu tâwk a na thei ang ber hremna pe turin thuneitute kan phut tlat a ni," an ti.

Mizoram Police chuan thuchhuah siamin, Lalhriat­puii d/o LT Zauva (L), Chhinga Veng, September 13 zinga Bagha-a thia chhar a nih thu Mizoram Police-in an dawn veleh hmalak nghal a ni tih an tarlang; Mizo mipuite chu social media-a thu thehdarh laka fimkhur tur leh thu léngvâk nazawng awih mai lo turin an ngen.

Police thuchhuah chuan, Lalhriatpuii thia chhar a nih thu an hriat veleh Vairengte OC leh a hote'n Bagha an pan nghal tih sawiin, "Thil thlenna hmun hi Dholai Police Station hnuai ni mah se, Mizoram Police aṭangin Vairengte OC leh a hote'n Dholai Police-te hma lakpuiin hnu chhuina atana ṭhil tul leh pawimawh an bawhzuiho nghal a, case pawh Dholai PS-ah ziah luh a ni," a ti.

Police tarlan danin, Lalhriatpuii thih thuah hian an bungraw leina Toibur Rahman Bhorbhuiya @ Rimpi s/o Tahir Rahman Bhorbhuiya Rajgat part-I, Dholai leh Lalhriatpuii te driver Lalhmingliana s/o Zaneihchhuma, Chhinga Vengte chu Dholai Police-in an man nghal a, tunah an hréng mek.

Hnu chhui hna uluk tak a kalpui niin, thu chiang hriat theih a la ni lo a; Mizoram Police aṭangin Kolasib SP-in Cachar SP a be pawp reng a, Vairengte OC-in a bawhzui reng bawk a ni.

Lalhriatpuii ruang chharna hmun tlawh tur leh Assam sorkara thuneitute hmu turin Home minister R Lal­zirliana chu vawiin hian Dholai-ah a kal dawn a; DIG Joseph Lalchhuana leh Kolasib SP ten an ṭawiawm ang.