Khawthlangtuipuiah thla 4 chuang marboat a service thei tawh lo

Tuilian vangin Tla­bung leh Serhuan inkarah kumin May thla aṭang khan Khawthlangtuipuiah marboat a service tawh lo a, marboat neitu leh construction company-te’n cheng nuai 15 chuang an hloh phaha chhût a ni.

Tlabung aṭanga thu dawn danin, India leh Bangladesh inrina Khawthlangtuipuiah hian lei dawh a la ni lo a, tuipui kân tur lirtheite chu marboat hmanga thiar kai ṭhin a ni. Tun dinhmunah Tlabung leh Serhuan inkar­ah mimal enkawl lai marboat pahnih a service ṭhin.

Kumin May thla aṭang khan Khawthlangtuipui chîm chin nasa taka a sàn bakah, khawsak phung tibuai khawpin a len avangin hun rei tak chhung marboat service tihtawp a ni tawh a; lawng lian pahnih a din hnuah lirtheite’n thla nga chhung tuipui an kân thei tawh lo.

Marboat service a awm loh avangin, Khawthlangtuipui râla khaw 10 chuangah lirthei a lut thei lo a; lirthei luh theih lohna khaw hrang hrang mipuite’n harsatna an tawh phah a ni.

Marboat service chawlh lailâwktir a nih avang hian, thla khatah Rs. 3,00,000 aia tam hloh a ni ṭhina chhût a ni a, thla nga chhung marboat service a awm loh chhung­a sum an hloh belh­khawm chu a vaiin Rs. 15,00,000 vela ngaih a nih thu, lawng neitute leh ramri hung hna thawktu construction company hotute chuan an sawi.

Marboat service neitu pakhat V Zorinpuia chuan, marboat a service theih loh vanga thla khata an hloh zât chu Rs. 1,00,000 a tling niin a sawi a, “Keini’n kan hloh ai chuan, construction company-te hloh a tam zawk,” a ti. Zorinpuia sawi danin, tui kám deuh tawh mah se, tuilianin lawng lian kàina hmunhma leh, a panna kawng a tihchhiat avangin, marboat a service leh ṭan mai theih a rinawm loh.

Tlabung leh Khaw­tlangtuipui ràl khaw hrang hrang inkalpawhna tur lei dawh a nih theih nan, Tlabung Progressive Society kaihhruaia VC leh NGO hrang hrang joint meeting chuan hmalak an lo rél tawh a; mahse, tun thlengin lei dawhna tura hmalakna mumal tak a la awm rih lo.