MSU hruaitute leh MP-in HRD Minister hmu

Mizo Students' Union (MSU) hruaitute leh Lok Sabha MP CL Rua­la te chuan, September 13, Nilaini tlai dar 6:30 khan Human Resource Development (MHRD) minister Prakash Javadekar chu Shastri Bhawan, Delhi-a a pisaah an hmu a; Mizorama zirna kaihhnawih thil hrang hrang an sawipui.

HRD Minister hnenah hian MIzoram University (MZU)-in vice chancellor (VC) nghet hun rei tak an neih tawh loh chungchang te, MZU southern campus Lung­leia dah thuai a nih theihna tur leh, centrally sponsored scheme (CSS) hnuaia Hindi zirtirtute chung­changte an thlen a; lehkha an thehlut a ni.

Prakash Javadekar chuan, MZU VC chungchang chu ni rei lo têah chinfel a nih tur thu sawiin, a file pawh India President pawmpui tura thawn phei a nih tawh thu leh, President-in a pawm hun hunah VC ruat beisei a nih thu a sawi. MZU southern campus chungchang pawh en zui a tum thu a sawi a ni.

CSS hnuaia Hindi zirtirtu eng emaw zat bàn an nih chungchangah chu a rang thei ang bera chinfel a nih tur thu sawiin Javadekar chuan, Mizo ṭhalaite'n Hindi zir an châk tih a hriatin a lawm thu leh Hindi teacher pek leh ngei a tum thu a sawi a; Hindi teacher rawih nan Central-in sum a sèn thlawn lohna turin, Mizo ṭhalaite'n ṭhahnemngai taka Hindi an zir theih nan leh Hindi zirna kawnga ke pên a nih theih nan ṭan la turin MSU hruaitute a chah.