MADC hnuaia ARC office hawng

Mara Autonomous District Council (MADC) hnuaia din thar, Administrative Reform Commission (ARC) pisa tur chu Nilaini khan MADC chief executive member (CEM) N Zakhai-a'n a hawng.

N Zakhai chuan, MADC-a Congress party kaihhruai sorkarin election manifesto anga hmalak zel a tum thu a sawi a, "ARC pawh hi kan manifesto tihlawhtling tura hmalakna chi khat a ni. ARC hian MADC hnuaia inrelbawlna ṭha zawk leh felfai zawk a hrin chhuah mai bakah, MADC hmêl pawh a ṭha zawnga a thlak danglam ngei ka beisei," a ti.

ARC chairman atana ruat K Riachho, IAS (Rtd.) chuan, "Sorkar ṭha nei tur chuan sorkar hnathawh leh hmalakna reng reng a langtlang tur a ni," a ti a; sorkarin rawng a bàwlsak mipuite ngai pawimawh chunga dan leh hrai ang thlapa hna a thawh thiam a pawimawh thu a sawi.

ARC-ah hian chairman leh member secretary bakah, member pathum an awm a ni.