KHAWTHLIR

Pipe thlâk dawn
Traffic SP chuan thupek chhuahin, Aizawl Water Transmission Division chuan Secretariat Complex-a MPSC office aṭanga Revenue office inkar kawngah vawiin aṭanga September 17 thlengin zing dar 8 aṭanga tlai dar 5 inkarah Aizawl Greater Water Supply Scheme Phase-I tui pipe hlui a thara an thlak dawn tih a tarlang a; pipe thlak hna thawh hun chhungin lirthei eng chi mah kal phal a nih dawn loh thu a puang.

RTI Week
Mizoram State Information Commission chu, Septemeber 13, 2017 khan chief information commissioner (CIC) Lalduhthlana Ralte hoin a pisaah an ṭhukhawm a, October 5, 2017-ah RTI Week hman an rel. District dang zawngah chuan IPRO-te hmalaknain a remchan huna hman turin an rel bawk.

Faina Hapta
Siaha DC Harleen Kaur hoin, Nilaini khan DC conference hall-ah Faina Hapta hman dan tur sawiho a ni. Faina Hapta pual hian sikul, pisa, biak-in, hotel, veng/kawtthler leh khaw fai an thlang dawn a; essay inziahsiak, debate leh extempore speech hmanga inelnate buatsaih a ni bawk ang.

Tlan khap
Kolasib DC chuan thupek chhuahin, Saihapui-K khaw chhunga thîr lei (bridge) chu a tuiêk nasat avang leh a upat tawh avangin, lirthei lian rit phur tan a him loh thu a tarlang a, "Mipui him zawkna atan he leiah hian 407 truck aia lian lirthei tlan khap a ni," a ti. Thupek hian thla hnih chhung a huam ang.

BLO training
Special Summary Revision of Electoral Roll atana inbuatsaihna kal zelah, Nilaini khan Lunglei Convention Centre-ah Lunglei North, Lunglei South, Lunglei East, Lunglei West leh Thorang bial chhunga booth level officer (BLO)-te tan training buatsaih a ni a; BLO hnathawh leh mawhphurhna hrang hrangte inhrilhhriat a ni.